మన దేశ రాజధానిని టార్గెట్ చేసే మిస్సైల్ ను పరీక్షించిన పాక్

పాకిస్థాన్ సైన్యం తన బలాన్ని ప్రదర్శిస్తూ భారత్‌లోని ప్రధాన నగరాలను లక్ష్యంగా చేసుకోగల సామర్థ్యం ఉన్న 'ఫతా-4’ క్రూయిజ్ మిస్సైల్‌ను విజయవంతంగా పరీక్షించినట్టుగా పాకిస్థాన్ మీడియా నుంచి వార్తలు వస్తున్నాయి. భారత రక్షణ రంగంలోని బ్రహ్మోస్ క్షిపణికి పోటీగా దీనిని పాకిస్థాన్ ఆర్మీ రాకెట్ ఫోర్స్ కమాండ్ అభివృద్ధి చేసింది. ఈ క్షిపణి యొక్క ప్రధాన విశిష్టత ఏమిటంటే, ఇది భూమికి సమాంతరంగా అతి తక్కువ ఎత్తులో ప్రయాణిస్తూ శత్రువుల రాడార్ వ్యవస్థల కళ్లుగప్పి లక్ష్యాన్ని చేరుకోగలదు. అత్యాధునిక ఏవియానిక్స్ మరియు నావిగేషన్ వ్యవస్థలతో రూపొందించబడిన ఈ క్రూయిజ్ మిస్సైల్, సుదూర ప్రాంతాల్లోని లక్ష్యాలను సైతం అత్యంత కచ్చితత్వంతో ఛేదించగలదని పాక్ సైనిక వర్గాలు వెల్లడించాయి.

సాంకేతిక సామర్థ్యం పరంగా చూస్తే, ఫతా-4 క్షిపణి సుమారు 750 కిలోమీటర్ల పరిధిని కలిగి ఉండి, 330 కిలోగ్రాముల బరువున్న వార్‌హెడ్‌ను మోసుకెళ్లగలదు. ఈ క్షిపణి పరిధి భారత్‌కు ఆందోళన కలిగించే అంశంగా మారింది. ఎందుకంటే పాకిస్థాన్‌లోని సరిహద్దు ప్రాంతాలైన లాహోర్ లేదా సియాల్ కోట్ నుండి దీనిని ప్రయోగిస్తే, భారత రాజధాని ఢిల్లీ మరియు ఎన్‌సీఆర్ ప్రాంతం నేరుగా దీని లక్ష్య పరిధిలోకి వస్తాయి. వీటితో పాటు పంజాబ్, జమ్మూ కశ్మీర్, హర్యానా, రాజస్థాన్, ఉత్తరప్రదేశ్‌లోని లక్నో, ఆగ్రా వంటి ప్రధాన నగరాలకు కూడా ఈ క్షిపణి ముప్పు పొంచి ఉంది. భారత్ ఇప్పటికే తన వద్ద ఉన్న ఎస్-400 (S-400) వంటి అత్యాధునిక రక్షణ వ్యవస్థలతో ఇటువంటి క్షిపణులను ఎదుర్కోవడానికి సిద్ధంగా ఉన్నప్పటికీ, పాక్ చేస్తున్న ఈ ప్రయోగాలు సరిహద్దుల్లో ఉద్రిక్తతలను పెంచే అవకాశం ఉంది.